У кожнага чалавека ёсць толькі адна родная мова. І становіцца вельмі горка, калі чалавек не шануе, забывае яе.
З нагоды свята бібліятэка падрыхтавала для наведвальнікаў шэраг мерапрыемстваў.
Для вучняў ДУА «Сярэдняя школа №37 г. Магілёва» прайшоў моўны турнір «Зямлі маёй родная мова». Хлопцы і дзяўчынкі пазнаёміліся з прыказкамі, прымаўкамі беларускага народа, адгадвалі загадкі-падманкі, здзейснілі падарожжа па гарадах Беларусі.
На дзіцячым абанеменце для маленькіх кнігалюбаў была прадстаўлена інтэрактыўная зона «Роднай мовы пералівы». Любы жадаючы мог прыняць удзел у гульнях: «Хто адгадае?», «Перагавары сябра», а таксама па малюнку даведацца аб значэнні беларускага слова.
На працягу дня чытачам былі прапанаваны кніжныя выставы: «Ведай нашых» - знаёміла з творамі сучасных беларускіх пісьменнікаў; «Чытайце беларускае» - сабрала лепшыя творы Беларусі для рознага ўзросту; «Новыя кнігі на любы густ» - рэкамендавала творы дзіцячых пісьменнікаў.
Завершылася свята творчай сустрэчай з магілеўчанкай, членам Саюза пісьменнікаў Беларусі – Аленай Беланожка.
Views: 40
